Nabi Kareem ﷺ par wahi ka ibtidayi daur ache sache pakeeza khowaboon se shuru howa. Aap ﷺ khuwabon mein jo kuchh dekhte woh subah ki roshni ki tarah sahih aur sacha saabit hota. phir minn janib qudrat Aap ﷺ tanhayi pasand ho gaye aur Aap ﷺ ne ghaar Hira mein khalwat nasheeni ikhtiyar farmayi aur kayi kayi din aur raat wahan musalsal ibadat aur yaad Ellahi o zikar o fikar mein mashgool rehte. Jab taq ghar ane ko dil na chahta tosha hamrah liye hue wahan rehte. tosha khatam hone par hi ahliya mohtarma Khadija razi Allah anha ke paas tashreef laate aur kuch tosha humrah le kar phir wahan ja kar khalwat guzein ho jate, Yahi tareeqa jari raha yahan taq ke Aal ﷺ par haq munkashif ho gaya aur Aap ﷺ ghaar e Hira hi mein qiyam Pazeer the ke achanak Jibraiel alaihisalam Aap ﷺ ke paas haazir hue aur kehne lage ke aey Mohammad ! padho, Aap ﷺ farmate hain ke, Maine kaha ke main padhna nahi jaanta, Aap Sallallah ﷺ farmate hain ke farishte ne mujhe pakar kar itnay zorr se bheencha ke meri taaqat jawab de gayi, phir mujhe chodd kar kaha ke padho, mein ne phir wohi jawab diya ke mein padha huwa nahi hoon. Uss farishte ne mujh ko nihayat hi zorr se bheencha ke mujh ko sakht takleef mehsoos hui, phir usne kaha ke padh! mein ne kaha ke mein padha huwa nahi hoon. farishte ne teesri baar mujh ko pakda aur teesri martaba phir mujh ko bheencha phir mujhe chodd diya aur kehne laga ke padho apne Rab ke naam ki madad se jis ne paida kiya aur insaan ko khoon ki phatki se banaya, padho aur Aap ka Rab bahut hi mehrbanian karne wala hai. pas yahi ayatein Aap ﷺ Jibraiel alaihisalam se sunn kar is haal mein ghaar Hera se wapas hue ke Aap ﷺ ke dil is anokhe waqia se kanp raha tha. Aap ﷺ khadijah Raziallah anha ke haan tashreef laaye aur farmaya ke mujhe kambal udha do, mujhe kambal udha do. logon ne Aap ﷺ ko kambal udha diya. jab Aap ﷺ ka dar jata raha. to Aap ﷺ apni zojah mohtarma Khadija razi Allah anha ko tafseel ke sath yeh waqia sunaya aur farmane lage ke mujh ko ab apni jaan ka khauf ho gaya hai. Aap ﷺ ki ahliya mohtarma Khadija razi Allah anha ne Aap ﷺ ka dhaaras bandhayi aur kaha ke aap ka khayaal sahih nahi hai. Allah ki Qasam! aap ko Allah kabhi ruswa nahi kerega, Aap to ikhlaq Fazila ke maalik hain, Aap to kunba parwar hain, be kason ka boojh apne sar par rakh lete hain, muflison ke liye aap kamate hain, mehman nawazi mein Aap be misaal hain aur mushkil waqt me Aap amar haq ka sath dete hain. aise Awsaf husna wala Insaan yun be waqt zillat o khawari ki mout nahi pa sakta. phir mazeed tasalli ke liye Khadija razi Allah anha Aap ﷺ ko warqa bin nofal ke paas le gayeen, jo un ke chacha zaad bhai the aur zamana jahliat mein nasrani mazhab ikhtiyar kar chuke they aur abrani zabaan ke katib the, chunancha injeel ko bhi hasb manshaye khuda wandi abrani zabaan mein likha karte the. ( injeel syriani zabaan mein nazil hui thi phir is ka tarjuma abrani zabaan mein howa. warqa isi ko likhate the ) woh bohat budhe ho gay they yahan taq ke unki binayi bhi rukhsat ho chuki thi. Khadija razi Allah anha ne unke samnay Aap ﷺ ke halaat bayan kiye aur kaha ke aey chacha zaad bhai! apne bhatije (Muhammad ﷺ ki zubani) zara unki kefiyat sun lijiye woh bole ke bhatije Aap ne jo kuch dekha hai, uski tafseel sunaaoo. chunanche Aap ﷺ ne az awwal taa aakhir poora waqia sunaya, jise sunn kar warqa be ikhtiyar ho kar bol utthay ke yeh to wohi Namoos ( Muaziz raaz daan farishta ) hai jise Allah ne moosa alaihisalam par wahi de kar bheja tha. kaash, mai aap ke is ehad nabuwat ke shuru hone par jawan Umar hota. kaash mein uss waqt taq zindah rehta jab ke aap ki qoum aap ko is shehar se nikaal degi. Rasool ﷺ yeh sun kar taajjub se poocha ke kya woh log mujh ko nikaal denge?
( halaank mai to un mein Sadiq o ameen o maqbool hoon warqa bola haan yeh sab kuch sach hai. magar jo shakhs bhi Aap ki terha amar haq lekar aaya log uske dushman hi hogaye hain. Agar mujhe aap ki nabuwat ka woh zamana mil jaye to mau aap ki poori poori madad karoon ga. magar warqa kuch dinon ke baad intqaal kar gaye. phir kuch arsa taq wahi ki aamad moqoof rahi.
(Sahi Bukhari, Hadees No. 03)
